هه‌ڵبه‌ستی ده‌روون
هه‌رچه‌ند ئه‌كه‌م ئه‌و خه‌یاڵه‌ی پێی مه‌ستم
بۆم ناخرێته نێو چوارچێوه‌ی هه‌ڵبه‌ستم
لێكدانه‌وه‌ی ده‌روون قسه‌ی زبانم
بۆچی وه‌ها دوورن له‌یه‌ك نازانم
ئه‌مویست ده‌روون بكرایه‌وه وه‌ك تۆمار
ده‌ركاوتایه دونیای جوانتر له به‌هار
ده‌ركه‌وتایه ئاواتی وا خه‌و بینین
پرشنگدارتر له ئه‌ستێره‌ی قوببه‌ی شین
ده‌ركه‌وتایه مانای مه‌نگی ده‌ریایی
كه نه‌رمه با له‌ڕووی ئه‌دا ئه‌سپایی
ده‌ركه‌وتایه ئه‌و دونیایه كه شیعری
بێ فرمێسكه‌و زۆرتر له فرمێسك ده‌گری
زه‌رده‌خه‌نه‌ی بێ ئاوێنه‌ی ده‌م‌و چاو
تیشكێك ئه‌دا ڕووناكتره له هه‌تاو
به‌ڵام ئه‌فسوس كه ئه‌و شیعره جوانانه
باڵدارێكن جێ ناهێڵن هێلانه
له ناوه‌وه ئه‌جریوێنن ئه‌خوێنن
هه‌رگیز قه‌ڵه‌م به كاغه‌زا ناهێنن
مامۆستا گۆران
<< Home