Gelato el Limone


خۆت چۆنیت وا به! پێویستناكات خۆت بگۆڕیت. یان Be yourself .
نازانێ ئه‌گه‌ر من myself بم، له‌وانه‌یه‌ چاره‌كێك سه‌عات له‌گه‌ڵم ئیداره‌نه‌كات.


تاریكی و سه‌رما به‌تاڵی ژووره‌كه‌م پڕده‌كه‌نه‌وه، خۆشم له‌ سووچێكه‌وه‌ دانیشتووم سه‌یری هه‌نگاوه‌كانیان ده‌كه‌م، جار به جاریش لێم نزێك ده‌بنه‌وه، ده‌یانه‌وێت بیان دوێنم. قسه‌م بۆ نایه‌ت، هه‌ستده‌كه‌م ماندووم و باش دڵم گیراوه. له‌ده‌ره‌وه‌ش ده‌نگه‌كان مردوون، ده‌ڵێی سه‌د ساڵه ڕوویان نه‌كردۆته ئه‌م شاره. كه‌مێكی تریش سه‌یری ئه‌و كتێبه‌ی به‌ر ده‌ستم ده‌كه‌م، چوارساڵه هێشتا به‌شی یه‌كه‌میم ته‌واونه‌كردووه. خه‌و ده‌مباته‌وه‌ تا په‌نجه‌كانت ده‌كه‌ونه سه‌ما له‌گه‌ڵ هه‌موو داوه‌كانی قژم.


پێی ده‌ڵێم په‌له‌م لێ مه‌كه‌، تۆش پێی ده‌ڵێی په‌له‌م لێ مه‌كه‌. مه‌گه‌ر پێشینان ناڵێن: كه‌س به په‌له‌په‌لێ ناگاته هه‌له‌هه‌لێ.
په‌له‌م لێمه‌كه، په‌له‌ی لێمه‌كه.

سه‌یره، له‌وانه‌شه سه‌یرنه‌بێت، مرۆڤه‌كان دڕنده‌تر ده‌بن، مرۆڤه‌كان زیاتر ده‌بن به مرۆڤ.
- "وه‌ره با پێت بڵێم بۆ دڵم ته‌نگه، ڕێگام بده با ڕوونی كه‌مه‌وه، به‌ڵام په‌له‌م لێمه‌كه تا یه‌كه‌م جار بۆ خۆمی ڕوونده‌كه‌مه‌وه."
- "تاقه‌تی ئه‌م قسه قۆڕانه‌م نییه، خۆ ژیان خۆی له خۆیدا خۆش نییه."

سارده، له‌وانه‌یه كووپێك چاوشیر گه‌رمم كاته‌وه. سارده‌و پاولۆ كۆنتێ به سمێڵی زلییه‌وه هاوارده‌كات Gelato el Limone ، ژووره‌كه ساردتر ده‌بێت.

به‌رامبه‌رم ده‌وه‌ستیت، سه‌یری چاوه‌كانم ده‌كه‌یت، نیگاده‌ده‌یت چۆن سه‌یری چه‌پ و ڕاست ده‌كه‌م. ده‌ڵێی وه‌ڵامی هه‌موو پرسیاره‌كانت لای منن. ببووره به‌ڵام من پرسیاره‌كان نازانم چین. به‌رامبه‌رم ده‌وه‌ستی و ده‌ڵێی دوو ده‌قه‌م ماوه، شه‌مه‌نده‌فه‌ره‌كم ده‌ڕوات. به په‌له ون ده‌بیت.

- "هه‌ر كه‌سێك بێهاوتایه، Everyone is Unique . بۆ تۆش وه‌ك هه‌موو خه‌ڵكی تر بێهاوتا نابیت؟"
- زۆر پێكه‌نیم. كه هه‌موو خه‌ڵك unique بوون، چۆن هه‌موویان unique ده‌بن؟ ده‌ی دیاره ته‌نها خۆم به گاڵته‌كانی خۆم پێده‌كه‌نم.

له‌وانه‌یه سه‌فه‌رێك بكه‌م بۆ پراگ. له‌وانه‌یه لای كافكا میوان بم، له‌وانه‌شه له هه‌موو هه‌نگاوه‌كانی سه‌ر پردی كارلی چواره‌م تۆم له‌گه‌ڵدا بیت.